चैत्र अष्टमीला श्री माता मळगंगा देवी यात्रेचा महासागर; नवस फेडण्यासाठी बगाडगाड्यात बसणाऱ्या भाविकांची श्रद्धा भावस्पर्शी

पारनेर प्रतिनिधी:ठकसेन गायखे

अहमदनगर जिल्ह्यातील निघोज येथील जागृत देवस्थान म्हणून ओळखल्या जाणाऱ्या श्री माता मळगंगा देवी यात्रेला यंदा चैत्र अष्टमीच्या पावन दिवशी लाखो भाविकांनी हजेरी लावत भक्तीचा महासागर उसळला. आज, दि. १० एप्रिल रोजी पार पडलेल्या या यात्रेत श्रद्धा, परंपरा आणि उत्साह यांचा अद्वितीय संगम पाहायला मिळाला. महाराष्ट्रातील सर्वात मोठ्या आणि प्रसिद्ध यात्रांपैकी एक असलेल्या या यात्रेने पुन्हा एकदा आपली भव्यता सिद्ध केली.
पहाटेपासूनच देवीच्या दर्शनासाठी भाविकांच्या लांबच लांब रांगा लागल्या होत्या. “जय मळगंगा माता”च्या घोषणांनी संपूर्ण परिसर दुमदुमून गेला होता. राज्याच्या विविध भागांमधून तसेच मुंबई, पुणे, नाशिक आदी शहरांतून आलेल्या भाविकांनी मोठ्या श्रद्धेने मातेचे दर्शन घेत नवस पूर्ण केला.
यात्रेतील सर्वात भावस्पर्शी आणि वैशिष्ट्यपूर्ण भाग म्हणजे नवसाचा बगाडगाडा. आपल्या मनोकामना पूर्ण झाल्यानंतर अनेक भाविक माता मळगंगेप्रती कृतज्ञता व्यक्त करण्यासाठी बगाडगाड्यात बसून आपला नवस फेडतात. ही परंपरा निघोजच्या यात्रेची खास ओळख असून, या वेळीही शेकडो भाविकांनी बगाडगाड्यात बसत श्रद्धेचा अनोखा अनुभव घेतला. बगाडगाड्यात बसताना भाविकांच्या चेहऱ्यावर दिसणारा समाधानाचा भाव आणि भक्तीचा आविष्कार सर्वांचे लक्ष वेधून घेत होता.

ढोल-ताशा, टाळ-मृदुंग, लेझीमच्या गजरात निघालेली बगाडगाडा मिरवणूक अत्यंत जल्लोषात पार पडली. “जय मळगंगा”च्या जयघोषांनी वातावरण भारावून गेले होते. या मिरवणुकीत सहभागी होण्यासाठी तसेच ती पाहण्यासाठी भाविकांनी मोठी गर्दी केली होती.मळगंगा ग्रामीण विकास ट्रस्ट, समस्त ग्रामस्थ निघोज तसेच मुंबईकर मंडळ यांच्या संयुक्त विद्यमाने यात्रेचे सुयोग्य नियोजन करण्यात आले होते. लाखो भाविकांची उपस्थिती लक्षात घेता वाहतूक, पिण्याचे पाणी, स्वच्छता, वैद्यकीय सेवा आणि सुरक्षा यांची उत्कृष्ट व्यवस्था करण्यात आली होती. स्वयंसेवकांनी भाविकांना मार्गदर्शन करत सेवाभावाने कार्य केले.
बगाडगाडा मिरवणूक पार पडल्यानंतर मळगंगा चित्रमंदिर परिसरात भव्य महाप्रसादाचे आयोजन करण्यात आले. हजारो भाविकांनी शिस्तबद्ध रांगा लावत महाप्रसादाचा लाभ घेतला.
यात्रेमुळे निघोज गावाला जत्रेचे स्वरूप प्राप्त झाले होते. गावातील प्रत्येक रस्ता आणि चौक भाविकांनी फुलून गेला होता.चैत्र अष्टमीला भरवली जाणारी श्री माता मळगंगा देवी यात्रा ही केवळ धार्मिक सोहळा नसून श्रद्धा, परंपरा आणि सामाजिक एकोप्याचे प्रतीक आहे. विशेषतः बगाडगाड्यात बसून नवस फेडण्याची परंपरा ही या यात्रेची ओळख ठरली असून, भाविकांच्या अखंड विश्वासामुळे या यात्रेचे महत्त्व दिवसेंदिवस अधिकच वृद्धिंगत होत आहे.

पारनेर प्रतिनिधी: ठकसेन गायके